លោក Donald Trump អះអាងថា ថៃជាអ្នកចាប់ផ្តើមសង្រ្គាមឡើងវិញជាមួយកម្ពុជា

ប្រធានាធិបតីអាមេរិក លោក Donald Trump បានអះអាងក្នុងថ្ងៃទី ២៣ ខែធ្នូនេះ ថា ប្រទេសថៃជាអ្នកចាប់ផ្តើមសង្រ្គាមឡើងវិញ និងវាយប្រហារមកលើប្រទេសកម្ពុជា។

ប្រធានាធិបតីអាមេរិក លោក Donald Trump បាននិយាយថា លោកបានដោះស្រាយបញ្ចប់សង្រ្គាមចំនួន៨ ក្នុងនោះរួមមានទាំងរវាងថៃ និងកម្ពុជា។

ឆ្លើយតបទៅនឹងសំណួរបស់ អ្នកសារព័ត៌មាន លោក ត្រាំ បានគូសបញ្ជាក់ដូច្នេះថា៖ ​“ខ្ញុំបានដោះស្រាយបញ្ចប់សង្រ្គាមចំនួន៨។ ឥរិយាបថរបស់ថៃចាប់ផ្ដើមល្អប្រសើរឡើងវិញ។ ដូចដែលអ្នកទាំងអស់គ្នាដឹងបន្ទាប់ពី ថៃ បានចាប់ផ្ដើមសង្រ្គាមផ្ទុះឡើងវិញជាមួយកម្ពុជា។ ថៃ និងកម្ពុជា បានចាប់ផ្ដើមសង្រ្គាមជាថ្មី។ ប៉ុន្តែខ្ញុំគិតថាលោក Marco យើងត្រៀមខ្លួនជាស្រេចដើម្បីដំណើរការចរចាបញ្ចប់សង្រ្គាមរវាងប្រទេសទាំង២ ដើម្បីឲ្យស្ថានភាពមានភាពល្អប្រសើរឡើងវិញ។”

តាមសេចក្តីថ្លែងការណ៍ ស្តីពីលទ្ធផលនៃកិច្ចប្រជុំពិសេស រដ្ឋមន្ត្រីការបរទេសអាស៊ាន ស្តីអំពីស្ថានភាពបច្ចុប្បន្ន រវាងកម្ពុជា និង ថៃ នាទីក្រុងកូឡាឡាំពួរ ប្រទេសម៉ាឡេស៊ី បានអំពាវនាវឲ្យប្រទេសទាំង ២ ត្រឡប់ ទៅរកការចរចា ស្វែងរកដំណោះស្រាយ យោងតាមការសម្របសម្រួលរបស់ប្រធានអាស៊ាន។

ទោះជាយ៉ាងណា យោធាថៃនៅតែបន្តការវាយប្រហារ មកលើដែនបូរណ៌ភាពរបស់កម្ពុជាដដែល។

ការឈ្លានពានរបស់ថៃ មកលើដែនអធិបតេយ្យកម្ពុជា តាមរយៈការវាយប្រហារដោយអាវុធគ្រប់ធុន ទាំងជើងគោក ជើងទឹក និងជើងអាកាស បានបណ្តាលឲ្យខូចខាតផ្ទះសំបែង និងសម្ភារប្រើប្រាស់របស់ពលរដ្ឋ អគារក្រុមហ៊ុន អគាររដ្ឋបាល សាលារៀន វត្តអារាម ប្រាសាទបុរាណ ផ្លូវថ្នល់ ស្ពាន និងអង្គភាព សាធារណៈជាច្រើនកន្លែង៕

ប្រភព៖ សេតវិមាន (White House) ដែលផ្សាយផ្ទាល់លើហ្វេសប៊ុក