ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ តំណាងដ៏ខ្ពង់ខ្ពស់ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានដឹកនាំប្រតិភូចូលរួមក្នុងវេទិកាច្បាប់ចិន-អាស៊ានលើកទី៧ (The 7th China-ASEAN Legal Cooperation Forum) ដែលប្រព្រឹត្តទៅនៃទីក្រុងឆុងឈីង សាធារណរដ្ឋប្រជាមានិតចិន
នាព្រឹកថ្ងៃសុក្រ ទី២១ ខែវិច្ឆិកា ឆ្នាំ២០២៥ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ តំណាងដ៏ខ្ពង់ខ្ពស់ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានដឹកនាំប្រតិភូនៃក្រសួងយុត្តិធម៌ ចូលរួមក្នុងពិធីបើកវេទិកាច្បាប់ចិន អាស៊ានលើកទី៧ (The 7th China-ASEAN Legal Cooperation Forum) ប្រព្រឹត្តទៅនៅទីក្រុងឆុងឈីង សាធារណរដ្ឋប្រជាមានិតចិន។ ប្រធានបទក្នុងវេទិកានាឆ្នាំនេះ ផ្តោតសំខាន់លើ«ការពង្រឹងកិច្ចសហប្រតិបត្តិការផ្នែកច្បាប់ចិន-អាស៊ាន, ការរួមគ្នាកសាងសហគមន៍នៃអនាគតរួមគ្នាក្នុងចំណោមប្រទេសជិតខាង» ដែលវេទិកានេះ សហការរៀបចំដោយសមាគមច្បាប់ចិន (China Law Society) និងមជ្ឈមណ្ឌលស្រាវជ្រាវច្បាប់ចិន-អាស៊ាន(CALRC)នៃសាកលវិទ្យាល័យវិទ្យាសាស្ត្រនយោបាយ និងនីតិសាស្ត្រភាគនិរតី(SWUPL)។
គួរបញ្ជាក់ផងដែរថា វេទិកានេះមានរបៀបវារៈចំនួន០៣(បី) បន្ថែមទៀត សម្រាប់អ្នកជំនាញផ្នែកច្បាប់ដែលមកពីបណ្តាប្រទេសនីមួយៗ ជជែកពិភាក្សា ក្នុងនោះ រួមមាន :
១. ការអប់រំ និងអភិវឌ្ឍន៍ទេពកោសល្យផ្នែកច្បាប់ (Legal Education and Talent Development)
២. មជ្ឈត្តការពាណិជ្ជកម្មអន្តរជាតិ (International Commercial Arbitration)
3. ការគ្រប់គ្រងឧក្រិដ្ឋកម្មឆ្លងដែន (Cross-Border Crime Governance)
បន្ថែមពីនេះ វេទិកានេះមានគោលបំណងជំរុញកិច្ចសហប្រតិបត្តិការលើវិស័យយុត្តិធម៌ ការពិភាក្សាទៅលើការស្រាវជ្រាវច្បាប់ និងការអនុវត្តច្បាប់ឱ្យមានប្រសិទ្ធភាពរវាងប្រទេសចិន និងបណ្តាប្រទេសដែលជាសមាជិកអាស៊ាន និងអាស៊ីបូព៌ា។ លើសពីនេះវេទិកានេះក៏ជាវេទិកាដ៏មានសារៈសំខាន់មួយក្នុងការផ្ដល់ឱកាសឱ្យអ្នកជំនាញដែលមកពីបណ្តាប្រទេសផ្សេងៗ មានឱកាសពិភាក្សា និងការផ្លាស់ប្តូរនូវបទពិសោធន៌ផ្សេងៗនៅក្នុងវិស័យយុត្តិធម៌។
Add Comment