ជំនួបសម្តែងការគួរសម និងពិភាក្សាការងារជាមួយគណៈប្រតិភូជាន់ខ្ពស់នៃក្រុមហ៊ុន RMA មជ្ឈមណ្ឌលឧត្តមភាពយានយន្តនៅកម្ពុជា (ACE-C) និង វិទ្យាស្ថាន BKI នៃប្រទេសអូស្ត្រាលី
រាជធានីភ្នំពេញ៖ នារសៀលថ្ងៃទី១៩ ខែវិច្ឆិកា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និងកីឡា បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូជាន់ខ្ពស់នៃក្រុមហ៊ុន RMA មជ្ឈមណ្ឌលឧត្តមភាពយានយន្តនៅកម្ពុជា (ACE-C) និង វិទ្យាស្ថាន Bendigo Kangan Institute (BKI) នៃប្រទេសអូស្ត្រាលី ដឹកនាំដោយលោកជំទាវ Briget COLLIERS អនុប្រធានបេសកកម្មនៃស្ថានទូតអូស្ត្រាលីប្រចាំកម្ពុជា និងមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
ជំនួបនេះមានគោលបំណង ដើម្បីស្វែងយល់ពីឱកាសពង្រឹង និងពង្រីកកិច្ចសហប្រតិបត្តិការលើវិស័យអប់រំបណ្តុះបណ្ដាលជំនាញ បច្ចេកទេស និងវិជ្ជាជីវៈនៅកម្ពុជា ដោយពិភាក្សាពិនិត្យលទ្ធភាពបង្កើតកម្មវិធីសិក្សា និងប្រព័ន្ធបណ្តុះបណ្តាលនៅតាមសាលារៀន តាមរយៈគម្រោងកិច្ចសហប្រតិបត្តិការសាកល្បងរវាង ក្រសួងអប់រំ យុវជន និងកីឡា, និង ACE-C, និង BKI។
ក្នុងឱកាសនៃជំនួបនេះ លោកJoe Ballato នាយកប្រតិបត្តិផ្នែកផ្តល់សេវាអប់រំ នៃ ACE បានឱ្យដឹងថា មជ្ឈមណ្ឌលឧត្តមភាពយានយន្តនៅកម្ពុជា (ACE-C) គឺជាគ្រឹះស្ថានបណ្តុះបណ្តាលវិជ្ជាជីវៈដែលបង្កើតឡើងដោយភាពជាដៃគូរវាងក្រុមហ៊ុន RMA (Cambodia) និងវិទ្យាស្ថាន (BKI) នៃប្រទេសអូស្ត្រាលី ក្នុងកិច្ចសហប្រតិបត្តិការជាមួយក្រសួងការងារ និងបណ្តុះបណ្តាលវិជ្ជាជីវៈកម្ពុជា ដែលមានបេសកកម្ម ដើម្បីបណ្តុះបណ្តាលអ្នកបច្ចេកទេសយានយន្ត និងជំនាញពាក់ព័ន្ធ ដែលមានការទទួលស្គាល់ជាអន្តរជាតិ តាមរយៈការបណ្តុះបណ្តាលជំនាញដល់យុវជនកម្ពុជាសម្រាប់ឧស្សាហកម្មយានយន្តទំនើប រួមទាំងតម្រូវការក្នុងការផ្លាស់ប្តូរជំនាញសម្រាប់និន្នាការឧស្សាហកម្មថ្មីៗ។
នាឱកាសនេះដែរ លោកស្រី Janelle ARENA ប្រធានផ្នែកឧស្សាហកម្ម និងអប់រំនៃវិទ្យាស្ថាន BKI ក៏បានបង្ហាញចំណាប់អារម្មណ៍ក្នុងការភ្ជាប់ទំនាក់ទំនងកិច្ចសហប្រតិបត្តិការលើវិស័យអប់រំ ជាមួយក្រសួងអប់រំ យុវជន និងកីឡា ដោយបានលើកឡើងនូវសំណើរៀបចំកម្មវិធីបណ្ដុះបណ្ដាលបច្ចេកទេស និងវិជ្ជាជីវៈ និងបានឱ្យដឹងថា BKI ដែលគឺជាស្ថាប័ន TAFE (Technical and Further Education) របស់រដ្ឋាភិបាលអូស្ត្រាលីដែលមានបទពិសោធជាច្រើនឆ្នាំលើការអប់រំជំនាញ បច្ចេកទេស វិជ្ជាជីវៈសម្រាប់ទីផ្សារការងារ និងឧស្សាហកម្មជាក់ស្តែង ដោយឯកទេសលើការបណ្តុះបណ្តាល ២ប្រព័ន្ធ (Dual Training System) តាមរយៈការអនុវត្តការងារផ្ទាល់ (work-integrated learning) និងការផ្តល់វិញ្ញាបនបត្រដល់គ្រូឯកទេស ក្នុងក្របខណ្ឌ Australian Qualifications Framework (AQF)។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបង្ហាញការស្វាគមន៍និងថ្លែងអំណរគុណដោយស្មោះចំពោះសំណើកិច្ចសហប្រតិបត្តិការលើកកម្ពស់វិស័យអប់រំបណ្ដុះបណ្ដាលជំនាញ បច្ចេកទេស និងវិជ្ជាជីវៈនៅកម្ពុជា ដោយបានគូសបញ្ជាក់នូវការឯកភាព ចូលរួមគាំទ្រ និងសម្របសម្រួលជំរុញឱ្យកិច្ចសហប្រតិបត្តិការនេះលេចចេញជារូបរាង និងដំណើរការទៅដោយរលូន ព្រមទាំងបានចែករំលែកពីវឌ្ឍនភាពនៃវិស័យអប់រំ បច្ចេកទេស និងវិជ្ជាជីវៈនៅកម្ពុជា ដែលកំពុងផ្តោតលើការជំរុញការផ្សារភ្ជាប់ការសិក្សាទ្រឹស្តីទៅនឹងការអនុវត្តផ្ទាល់នៅក្នុងឧស្សាហកម្មជាក់ស្តែង។
កន្លងមក ក្រសួងអប់រំ យុវជន និងកីឡា បានអនុម័តលើគោលនយោបាយគាំទ្រដល់ការអប់រំបច្ចេកទេស វិជ្ជាជីវៈ ដូចជា ការទទួលស្គាល់កម្មវិធីសិក្សា និងការដាក់បញ្ចូលទៅក្នុងប្រព័ន្ធអប់រំ,ការគ្រប់គ្រងកម្មសិក្សាការី និងការលើកទឹកចិត្តនិយោជកសហហិរញ្ញប្បទាន, ការរៀចំកម្មវិធីបណ្តុះបណ្តាល និងការផ្តល់វិញ្ញាបនបត្រដល់គ្រូឯកទេស, ការលើកទឹកចិត្ត និងជំរុញការចូលរួមរបស់វិស័យឯកជន និងដៃគូអភិវឌ្ឍន៍នានា តាមរយៈកម្មវិធីសហហិរញ្ញវត្ថុ ដើម្បីធានាគុណភាព និងនិរន្តរភាព។ រាជរដ្ឋាភិបាលកម្ពុជាបានកំណត់អាទិភាពលើការបណ្ដុះបណ្ដាលធនធានមនុស្ស ខណៈកម្ពុជាមានចំនួនយុវជនច្រើនដែលត្រូវការជំនាញខ្ពស់សម្រាប់ចូលរួមអភិវឌ្ឍប្រទេសជាតិ ព្រមទាំងកំពុងផ្តោតការយកចិត្តទុកដាក់បង្កើតប្រព័ន្ធអេកូឡូស៊ីឧស្សាហកម្ម និងមានបំណងចង់សហការជាមួយស្ថាប័នដែលមានបទពិសោធ និងមានទំនួលខុសត្រូវខ្ពស់។
តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅចំពោះការសម្របសម្រួលពីសំណាក់ស្ថានទូតអូស្ត្រាលីប្រចាំកម្ពុជា ក៏ដូចជាថ្លែងអំណរគុណដល់គណៈប្រតិភូនៃក្រុមហ៊ុន RMA, ACE និង BKI ដែលបានវិនិយោគលើវិស័យយានយន្ត និងការបណ្តុះបណ្តាលជំនាញបច្ចេកទេស និងវិជ្ជាជីវៈនៅកម្ពុជា ដែលនេះពិតជាបានចូលរួមចំណែកយ៉ាងសំខាន់ដល់ការពន្លឿនកំណើនសេដ្ឋកិច្ច និងការអភិវឌ្ឍធនធានមនុស្ស ឆ្លើយតបនឹងចក្ខុវិស័យរាជរដ្ឋាភិបាលក្នុងការជំរុញឱ្យពលរដ្ឋម្នាក់ត្រូវមានជំនាញមួយយ៉ាងតិចប្រចាំជីវិត ឆ្ពោះទៅសម្រេចចក្ខុវិស័យកម្ពុជាឆ្នាំ ២០៣០ និង២០៥០៕
១៩ វិច្ឆិកា ២០២៥ | រាជធានីភ្នំពេញ
Add Comment